Categorie: Piemonte

Il saluto di “Piemont” ad Anna Sartoris

di Roberto Gremmo – El cheur a l’é a tòch për la mòrt ‘d Anna Sartoris, che për ann a
l’é stàita porta drapò e architrav dla bataja për la libertà ‘d
nòstr pòver e masentà Piemont.
A l’era ‘nt ël fior dla gioventura e ‘n ël 1973 a butava la vita a risigh
diventand rapresentant dl’“Associassion Lìber Piemont” ch’a marcava ‘l papé dla fradlansa coj frej basch, irlandèis, sard, fiamench e
harpitan. sò angagi, fàit dna militansa silensiosa ma fondamental
tutun che sagrigianta, a seghitava prima con “Rinascita Piemontese”
e con “Arnàssita Piemontèisa” e peuj “Union Piemontèisa”.
Ore e ore gavà a soa libertà për fé tichëtte, bate a machina articoj, corege boro e peuj, vàire vòlte
solenga, giré a taché tilet sij mur, archeuje ij signature për le liste eletoraj e ‘dcò finì sot proces
(ma fortunatament asolvua) denonsià dai nemis dla nòstra bataja.
Rivà a la Comun-a ‘d Santhià a l’era batzà dëspressiament daj gasëtié vendù “Madama Piemont”
ma an pòch temp a l’ha fasse apressé da tuti për soa grassia, gentilëssa, onestà e coragi.
Savend che la ques-cion dië strangé a sarìa diventà ‘l problema sentral ëd costi ann, an Ast a
fasìa nasse la “Lega contro la droga e l’immigrazione clandestina”, ciapandse fin-a dle bòte dai
‘democratich’ ch’a jë spuavo adòs dandje dla “rasista”, pròpe a chila ch’a l’era la fradlansa e
l’umanità butà ansema.
A l’é staita la prima fomna ‘d un moviment aotonomista al Consej Regional dël Piemont e a
l’ha subit vagnasse le prime pàgine an parland ant ël cit parlament nostran ant la lenga genìta dël
pòpol.
Ant ël midem temp, a tenìa aot ël drapò a la Comun-a ‘d Biela e a la Provinsa ‘d Varsej, sempre
con onor, passion, sentiment e lealtà.
It salutoma Anna, con le fior salvaje dla montagna; l’ucament d’un can spërdù e doj delfin ‘nt
ël mar.